ما أنتّ "يونس" لو بلعك الحوت = كمم فمك لا تنطق المحذور
تدعو ودعواتك عليك ؛ تفوت = لأنْ "حوتك" بالأصل مسعور
عادي ؛ تعيش الموت لجل الموت = يعيش فينا شاهدً وقبور
يا صاحبي يا الصاحب المبخوت = بالدوران اللي عجز مالدور
لا تفصّل المسمي على المنعوت = وحنا بنادقنا خجم ماتثور
إلا علينا ؛ حين نشحذ قوت = نشبع عذر والعذر مالمعذور
بزبوزنا يغسل وجع بيروت = وبيوتنا بالمعوزين تمور
نفطر "حكي " ونصوم بالمفتوت = نكنز قناعة في معين الزُّور
أوجاعنا وسط البيوت بيوت = وأحلامنا دون القصور قصور
نُشكر إذا كُنّا هدوم سكوت = ونبطر إذا قلنا الوضع مخطور
ياصاحبي خلك كذا ؛ مليوت = في هامشك وتسير جنب السور
لو ينتصف مظلوم من طاغوت = لُفّق حديث وقيل ذا ماثور
من ينصح إمام الزمن هلفوت = لا يُسمع لنُصحه ولا له شور
لا تبطر " النعمة " تجي عكروت = تفتح عيونك والنظر محظور
ما يكفي إن لك النفس مفلوت = مثلك نبيه ويشكُر المشكور
يا صاحبي في "نعمتك" منحوت = اقر المثاني السبع يا مطيور
محسوب دون الرُشد لين تموت = جاهل وتعرف من جهل مكبور
اسمع كلام إمامك المثبوت = بالعلم ؛ لوّك تعلمه طرطور
أكتب قصيد "بمي" ولا "نوت" = خلّك بعشق الفاتنة مأسور
لا تفتح لعين الملا تابوت = يزعل إمامك يحرمك "مالحور"
ضمّ الشعر في داخلك مكبوت = لا تنصبه ويصير بك مجرور